पुनर्निर्माण अपडेट

विकास सहायता समितिको पाँचौ बैठक


प्रकाशित मिति: २०७४-६-२७

राष्ट्रिय पुनर्निर्माण प्राधिकरण विकास सहायता समन्वय तथा सहजीकरण समितिको पाँचौं बैठक बिहीबार सिंहदरवारस्थित प्राधिकरणको कार्यालयमा बसेको छ । बैठकमा पुनर्निर्माणमा हालसम्म भएका उपलव्धि र देखिएका अवरोधहरुबारे छलफल भएको थियो ।
प्राधिकरणका प्रमुख कार्यकारी अधिकृत एवं समितिका संयोजक (सिइओ) प्रा.डा. गोविन्दराज पोखरेलको अध्यक्षतामा बसेको बैठकमा विकास साझेदार संस्थाका प्रतिनिधिहरुले प्राधिकरणद्धारा गरिएका निब्र्याजी ऋण, निजी आवास निरीक्षण, प्राधिकरणको संचार रणनीति, गुनासो व्यवस्थापनलगायतका विषयमा धारणा राखेका थिए ।
बैठकमा डा. पोखरेलले हालसम्म निर्माण भएका र भइरहेका निजी आवासको संख्या करिब दुई लाख पुगेको, तिहारपछि धेरै लाभग्राहीले निजी आवास पुनर्निर्माण सुरु गर्ने योजना बनाएकोले पुस मसान्तसम्म यो संख्या ३ लाख ५० हजार पुग्ने बताउनुभयो । उहाँले पुनर्निर्माणका लागि प्राविधिक जनशक्ति मुख्य चुनौती रहेको भन्दै प्राविधिक सहयातामा अझै बढी केन्द्रित हुन बिकास साझेदार संस्थाका प्रतिनिधीहरुलाई आग्रह गर्नुभयो ।
डा. पोखरेलले हालै मात्र सरकारले घोषणा गरेको निर्माणधीन घर धितो राखी अधिकतम तीन लाख रुपैयाँसम्मको निब्र्याजी ऋणले विपन्न समुदायलाई मद्दत पुग्ने विश्वास व्यक्त गर्नुभयो । उहाँले निर्माण जनशक्ति सबैभन्दा ठूलो अवरोधका रुपमा रहेको उल्लेख गर्दै भूकम्प प्रभावित बाहेकका अन्य जिल्लामा पनि जनशक्ति उत्पादनका लागि तालिम संचालन गर्ने तयारी भइरहेको बताउनुभयो ।
डा. पोखरेलले सबैको सहकार्यमा पुनर्निर्माणको अभियानलाई तिव्रता दिएर अघि बढ्ने बताउनुभयो ।
बैठकमा प्राधिकरणका सहसचिव एवं प्रवक्ता यमलाल भुसालले पुनर्निर्माण प्रगति, प्रमुख नीतिगत कार्यहरु, वित्तीय अवस्था, पुनः जाँच र पुनः सर्भेको अवस्था, स्थानीय तहको भूमिका, १७ जिल्लामा कार्यान्वयनको अवस्था र प्राधिकरणको जनशक्तिको अवस्था आदि बिषयमा कार्यपत्र प्रस्तुत गर्नुभयो ।
बैठकमा नेपालको पुनर्निर्माण क्षेत्रमा सहयोग गरिरहेका विकास साझेदार संस्थाका प्रतिनिधिहरु, प्राधिकरणका कार्यकारी समितिका सदस्यहरु, प्राधिकरणका अधिकारी केन्द्रिय आयोजना कायान्वयन इकाईका प्रमुखलगायतका उपस्थिति थियो ।  

Share on

समाचार तथा जानकारी

सूचना+ More

Twitter Feed